Bankamenn sögðu verð FL Group hátt

„Við vonumst til þess að sjá einhver ný andlit í hluthafahópnum,“ segir Jón Ásgeir Jóhannesson, stjórnarformaður FL Group, um hlutafjáraukningu félagsins. „Við erum að vinna í því að styrkja eiginfjárgrunn FL Group svo við getum tekið á okkur áföll ef þau verða. Við tökum líka þátt í hlutafjáraukningunni til að slá á sögur um að allt sé að brenna hjá FL. Þetta er sterkt félag á alla mælikvarða.“

Baugur Group sem Jón Ásgeir stýrir seldi FL Group í gær fasteignafélög að verðmæti 54 milljarðar króna. Baugur fær greitt með hlutafé í FL Group og verður stærsti eigandi félagsins með tæplega 36 prósent. Að auki verða tíu milljarðar króna boðnir fagfjárfestum og fimm til viðbótar verði umframeftirspurn eftir hlutum í félaginu.

Öll þessi viðskipti með bréf FL Group fara fram á genginu 14,7 sem er þónokkuð lægra en til stóð fyrir helgi. Viðskipti með bréf FL Group í fyrradag voru á genginu 19,25.

Samkvæmt heimildum Fréttablaðsins þrýstu viðskiptabankar Baugs á að gengið yrði lægra en til stóð. Jón Ásgeir segir að annaðhvort hefði þurft að kaupa fasteignir Baugs á hærra verði eða lækka verð á FL. Margar stærðir hafi einnig breyst í þessari vinnu.

„Menn sáu tækifæri í því að lækka verðið. Þá gefst tækifæri til að selja fleirum á þessu verði sem er mjög hagstætt miðað við sambærileg félög,“ segir Jón Ásgeir.

Hannes Smárason hættir sem forstjóri FL Group og Jón Sigurðsson, sem hefur verið aðstoðarforstjóri, tekur við. Jón segir jákvætt að óvissu um stjórn og styrk félagsins hafi verið eytt. Verkefnið fram undan sé að sinna fjárfestingum FL Group með öflugu fasteignarfélagi innanborðs. Á óvissutímum á mörkuðum muni FL Group fara hægar yfir.

Hannes segist sáttur að stíga úr forstjórastólnum á þessum tímapunkti.

„Mín staða er þokkaleg. Ég er áfram stór hluthafi í félaginu. Ég ætla að koma inn í Geysir Green og halda áfram sem fjárfestir. Þetta verður ekki mikil breyting fyrir mig.“