Aumlegt yfirklór

Bæjarstjórinn í Kópavogi réð vin sinn í vinnu hjá bænum án þess að auglýsa starfið. Hann ákvað að borga honum laun langt umfram þá taxta sem í gildi eru að aðrir starfsmenn bæjarins verða að sætta sig við. Trúr og duglegur starfsmaður bæjarins sem vinurinn var settur við hliðina á, gerði athugasemd. Bæjarstjórinn gerði við hann starfslokasamning, sem á mannamáli þýðir að hann var rekinn!

Bæjarstjórinn hefur lýst sinni hlið á málinu og hún er ósköp einföld. Vinur hans er miklu meira virði en aðrir starfsmenn bæjarins og það er ekki hægt að bjóða honum að vinna á þeim lágu kauptöxtum sem bærinn borgar eftir. Svo einfalt er það. Grunnlaun hans eru 240 þús. kr. og til viðbótar fær hann fullt af föstum yfirvinnutímum, eða 60. Hann fær því laun upp á tæplega 400 þús. kr. á meðan aðrir með svipaða menntun sem vinna svipuð störf verða að sætta sig við helminginn af því eða minna. Laun hans eru algjörlega á skjön við kjarasamninga sem aðrir starfsmenn verða þó að fá greitt eftir.

Eftir að hafa lítilsvirt bæjarstarfsmenn og sýnt þeim fáheyrðan hroka hefur bæjarstjóri ásamt ímyndarsmiðum sínum reynt að breiða yfir drambið og hrokann. Í yfirlýsingum frá honum var hann "að koma því að framfæri í viðtali við fréttamanninn að viðkomandi verkefnisstjóri yrði ekki ráðinn til bæjarins á launataxta ritara," þegar hann sagði vin sinn "hafa verið hvalreka fyrir Kópavogsbæ og að augljóst sé að slíkur fengur myndi ekki koma til starfa hjá bænum á taxtalaunum." Hver á að trúa svona yfirklóri?

Í grein í Fréttablaðinu gerir bæjarstjórinn lítið úr þessu máli. Þarna sé Guðríður Arnardóttir, oddviti Samfylkingarinnar bara að "ná fram hefndum fyrir flokksbróður sinn eftir að ég [Gunnar] vakti athygli á því að hann hefði verið vanhæfur í skólanefnd þegar frændi hans var ráðinn aðstoðarskólameistari hér í bæ." Gunnar veit jafnvel og aðrir að búið var að ráða í stöðuna, tilkynna um ráðninguna í fréttatilkynningu frá bænum auk þess sem maðurinn var búinn að starfa sem aðstoðarskólastjóri í þrjár vikur þegar málið var tekið fyrir í skólanefnd. Í skólanefnd voru ekki greidd atkvæði heldur lagði hún síðbúna blessun yfir ráðninguna. Skólanefndarmaðurinn var ekki vanhæfur hvort sem bæjarstjóranum líkar betur eða ver. En meðal annarra orða - veit bæjarstjórinn ekki að í grunnskólum bæjarins er stöðuheitið aðstoðarskólameistari ekki til?

Það er í rauninni kostulegt og dapurlegt í senn að bæjarstjóri skuli halda að hefndarhugur hafi komið þessu máli af stað. Það lýsir e.t.v. best hversu léttvægt hann telur það að hygla sínum vini sérstaklega. Yfirklór bæjarstjórans er aumlegt. Hann hefur sjálfur sagt að honum finnist sjálfsagt að borga vini sínum miklu hærri laun en öðrum starfsmönnum bæjarins. Framkoma hans er óásættanleg og ólíðandi. Lítilsvirðingin í garð starfsmanna Kópavogsbæjar á sér ekki hliðstæðu. Menn í hans stöðu hafa engan rétt til að hygla vinum sínum. Spilling er rétta orðið yfir þetta.

Höfundur er bæjarfulltrúi Samfylkingarinnar í Kópavogi.