Erlent

Búast við áframhaldandi látum í dag

AP

Meira en 200 hafa verið handteknir og þrír eða fjórir mótmælendur hafa slasast alvarlega í átökum lögreglu og mótmælenda á Norðurbrú í Kaupmannahöfn en lögregla rýmdi Ungdomshuset svokallaða með áhlaupi í gærmorgun. Heldur var rólegra í nótt en í gærkvöldi en lögregla býst við miklum látum áfram í dag.

Götueldar loguðu víðsvegar um Norðurbrú langt fram á nótt. Ungdomshuset stendur enn og ekki hefur verið ákveðið hvenær skuli rífa það.

Hústökufólk, um 100 manns, lagði undir sig barnaskóla við Blågårdsgade og beitti lögregla táragasi til að reyna að svæla fólkið út. Ungmennin yfirgáfu svo skólann sjálfviljug en fyrst reyktu þau nokkrar hassjónur og sungu baráttulög og gengu svo róleg út sagði ónefndur hústökumaður í samtali við Politiken í Danmörku. Sami heimildarmaður fullyrti þó að frekari hústökur væru áætlaðar af hópnum á næstu dögum.

Mikil læti voru þá í Kristjánshöfn nærri Kristjaníu langt fram á nótt en þar höfðu mótæmlendur reist götuvirki og kveikt í rusli og bílum. Lögregla beitti táragasi til að dreifa fjöldanum.

Dönsk ungmenni fengu svo stuðning frá grönnum sínum í Hamborg í Þýskalandi en þar mótmæltu meira en 800 manns utan við danska sendiráðið. Þar voru 14 handteknir í látunum í gærkvöldi.

Sólrún María Reginsdóttir, íslensk stúlka sem er í námi í Danmörku og býr á Norðurbrú var á leið heim til sín í gærkvöldi þegar átökin stóðu sem hæst. Hún sagði í samtali við Vísi að hún hefði fengið snert af táragasi sem lögreglan hafði notað gegn mótmælendum. Henni varð þó ekki meint af þar sem gasið hafði þynnst nógu mikið.

AP
AP
AP
AP
AP
AP
AP
AP
AP
AP
AP
AP

Tengdar fréttir

90 handteknir vegna mótmæla

Lögreglan í Rødovre í nágrenni Kaupmannahafnar handtók 90 mótmælendur á unglingsaldri við samkomuhús trúfélagsins Faderhuset á sunnudag. Vildu ungmennin mótmæla fyrirhuguðum flutningi æskulýðsstarfs trúfélagsins í byggingu sem nú hýsir Ungdomshuset, samkomustað ungs fólks á Norðurbrú í Kaupmannahöfn.

Ætlar borgin að rífa húsið strax í dag?

Ungmenni sem haft hafa aðstöðu í Ungdomshuset hafa kveikt elda á Nörrebrogade og henda nú grjóti og flöskum í átt að lögreglu sem stendur vakt um Ungdomshuset í Kaupmannahöfn. Samkvæmt heimildum Vísir ætlar lögregla að standa vörð um húsið í dag á meðan stórvirkar vinnuvélar koma og rífa það niður, þetta er þó ekki staðfest. Þá munu ungmenni vera að skipuleggja tilraun til að komast aftur inn í húsið.

Lögregla eykur viðbúnað vegna mótmæla

Lögregla eykur enn viðbúnað við Ungdomshuset í Kaupmannahöfn. Fjölmörgum leikskólum og skólum í Nörrebro-hverfinu hefur verið lokað. Þá er lögregla með sérstaka vakt við Stórabeltis-brúnna þar sem búist er við því að ungmenni víðsvegar að í landinu ætli að flykkjast til Kaupmannahafnar til að taka þátt í að mótmæla aðgerðum lögreglunnar við Ungdomshuset. Mótmælendum hefur þegar fjölgað mikið og hefur lögregla að sama skapi aukið viðbúnað sinn. Nokkrir götueldar loga nú í götunum í kringum Jagtvej, þar sem Ungdomshuset stendur en lögregla hefur lokað Jagtvej í báða enda.

Lögregla rýmdi Ungdomshuset

Lögreglan í Kaupmannahöfn gerði áhlaup og rýmdi Ungdomshuset á Norrebro á svipstundu í morgun. Þegar hefur fjöldi mótmælanda safnast saman og búist er við hörðum átökum. Lögregla hefur handtekið um 20 mótmælendur, þ.á.m. hóp sem reyndi að komast framhjá vegtálmum.

Merkri sögu Ungdomshuset að ljúka

Í dag lauk langri sögu Ungdomshuset sem hefur verið vinsæll samkomustaður fyrir ungmenni Kaupmannahafnar í marga áratugi. Átökin milli þeirra og borgaryfirvalda hafa stigmagnast á síðustu misserum og náðu hámarki með rýmingu hússins í morgun. Fróðlegt er að skoða forsögu hússins í ljósi atburða dagsins.

260 handteknir eftir mótmæli í Kaupmannahöfn

Yfir 260 ungmenni voru handtekin í Kaupmanna í gær þegar friðsamleg mótmæli til stuðnings félagsmiðstöðinni Ungdomshuset leystust upp í óeirðir.Talið er að um 800 manns hafi tekið þátt í mótmælunum en þegar einhverjir mótmælenda fóru ekki að fyrirmælum lögreglunnar leysti hún hópinn upp.

Rífa húsið strax í dag

Lögregla ætlar að rífa Ungdomshuset strax í dag og þegar hefur sprengiefni verið flutt inn í húsið. Aðstandendur hússins hafa boðað frekari fjöldamótmæli í kvöld og búist er við miklum fjölda. Á áttunda tug hafa verið handteknir í mótmælunum.

Óeirðir við Kristjaníu

Óeirðir eru að brjótast út við Kristjaníu í Kaupmannahöfn en þar hafa ungmenni reist vegatálma og fleygt bensínsprengjum. Slökkvilið er á staðnum og reynir að slökkva eldana.Talið er að ungmennin séu að reyna að draga athygli lögreglunnar frá Ungdomshuset á Norrebro. Þar hafa einnig verið kveiktir götueldar og þar er lögregla með mikinn viðbúnað.

Hörð átök á Norðurbrú

Stríðsástand ríkti í Kaupmannahöfn í gær eftir að lögreglan hafði rýmt Ungdómshúsið á Norðurbrú.

Umsátur á Norðurbrú

Lögreglan í Kaupmannahöfn gerði áhlaup á Ungdomshuset á Norðurbrú í morgun og rýmdi það á svipstundu. Til harðra átaka hefur komið. Óeirðir eru einnig að brjótast út í Kristjaníu þar sem ungmenni hafa reist vegatálma og fleygt bensínsprengjum.

Mest lesið


Fleiri fréttir

Sjá meira


×

Mest lesið