Þinganes strandaði í innsiglingunni að Höfn

Fiskveiðiskipið Þinganes SF 25, sem er í eigu útgerðarfyrirtækisins Skinneyjar-Þinganess, strandaði við innsiglinguna að Höfn í Hornafirði um sjöleytið í morgun. Skipið strandaði við svokallaðan Helli og var lóðsbáturinn Björn Lóðs frá Höfn í Hornafirði sendur út. Hann stjakaði við skipinu sem komst aftur á flot um tveimur tímum eftir strandið.

Ekki munu hafa orðið skemmdir á skipinu þar sem það strandaði á sandbotni og komst það heilt til hafnar. Skipið var að koma af þorskveiðum þegar það strandaði en 8-9 manns eru í áhöfn þess.