Valur tapaði fyrir Fylki á heimavelli

Valur tapaði í kvöld gegn Fylki á heimavelli með tveimur mörkum gegn fjórum. Leikurinn var bráðskemmtilegur og voru Valsmenn yfir í hálfleik eftir að hafa lent undir snemma leiks. Valsmenn misstu þar með af tækifærinu til að komast á topp deildarinnar og sitja áfram í öðru sæti með 21 stig. Fylkir komst með sigrinum upp í fimmta sætið með 15 stig.

Fylkir komst yfir á 16. mínútu þegar Peter Gravesen skoraði úr vítaspyrnu sem dæmd var á Kjartan Sturluson, markvörð Vals. Valsmenn voru þó ekki lengi að jafna sig því að Daníel Hjaltason jafnaði leikinn mínútu síðar. Markahrókurinn Helgi Sigurðsson kom Valsmönnum svo yfir á 35. mínútu með marki eftir hornspyrnu. Staðan var því 2-1 í hálfleik.

Fylkismenn komu mun einbeittari til leiks í seinni hálfleik og spiluðu góðan bolta. Valur Fannar Gíslason jafnaði leikinn á 53. mínútu og Halldór Hilmisson kom svo Fylkismönnum yfir fimm mínútum síðar. Það var svo Albert Ingason sem gulltryggði sigurinn á 71. mínútu eftir slæm varnarmistök Valsmanna.