Björgólfur bjargaði toppsætinu fyrir FH-inga

Í lok hverrar umferðar í efstu deild Íslandsmóts karla mun Fréttablaðið gera upp liðna umferð með þeim hætti sem sést nú. Lesendur geta glöggvað sig á ýmissi tölfræði, velt fyrir sér vali á liði og leikmanni umferðarinnar auk þess sem við veljum þau bestu ummæli sem látin voru falla í tengslum við leikina fimm.

Það sem stendur uppi eftir þessa fyrstu umferð er án efa sú staða að FH heldur toppsætinu í deildinni, 45. umferðina í röð. Þeir hafa ekki látið toppsætið af hendi síðan þeir hrifsuðu það af Fylkismönnum í júlímánuði 2004.

Sérstaklega athyglisvert er að nú, þriðja tímabilið í röð, nær FH toppsæti deildarinnar strax eftir fyrstu umferðina. Það leit reyndar út fyrir að Keflavík ætlaði að tylla sér á toppinn með 2-0 sigri á KR en Björgólfur Takefusa minnkaði muninn fyrir sína menn skömmu fyrir leikslok. Þar með hélt FH sér á toppnum með fleiri skoruðum mörkum en bæði Keflavík og Fylkir.

Þetta er vitanlega met. Gamla metið var sett á tíunda áratugnum á gullaldartíð ÍA. En sá árangur hefur nú verið um það bil þrefaldaður af FH. Ef það fellur einhverntímann er nokkuð víst að það muni standa um ókomna tíð.

Bestu dómararnir: Jóhannes Valgeirsson og Magnús Þórisson

Þeir Jóhannes Valgeirsson og Magnús Þórisson voru þeir einu af öllum dómurum og reyndar leikmönnum líka sem fengu 8 í einkunn fyrir frammistöðu sínar. Báðir dæmdu þeir víti í sínum leikjum og gáfu rauð spjöld.



Bestu ummælin: Guðjón Þórðarson, þjálfari ÍA, sagði að sínir menn hafi sýnt fram á veikleika FH-liðsins eftir 3-2 tap fyrir Íslandsmeisturunum á heimavelli. "... þá eru veikleikar í varnarstöðunni hjá þeim. Það sást berlega á því að við skorum tvö mörk hjá þeim. Þeir voru jafnvel heppnir að fá ekki á sig jöfnunarmarkið." Bætti hann svo við að önnur lið gætu fært sér sýnda veikleika í nyt.



Tölurnar tala

Flest skot: Valur 19

Hitta rammann oftast: FH 9

Fæst skot: Keflavík 6

Besta skotnýting: Keflavík 33%

Hæsta meðaleinkunn: HK 5,83

Lægsta meðaleinkunn: Fylkir 4,67

Grófasta liðið: Fylkir 28 brot

Prúðasta liðið: Breiðablik 5 brot

Fjöldi áhorfenda: 6950 manns

Tæplega sjö þúsund manns komu á leiki í 1. umferð deildarinnar í ár. Er það önnur minnst sótta opnunarumferðin á síðastliðnum sex tímabilum og klárlega vonbrigði fyrir knattspyrnuforystuna. Fyrsta umferðin er alltaf vinsæl og mun það væntanlega koma í ljós í næstu umferðum hversu áhuginn er mikill í raun og veru.



Lið umferðarinnar:

Mark: Bjarni Þórður Halldórsson, Víkingi

Vörn: Stefán Jóhann Eggertsson, HK - Ásgrímur Albertsson, HK - David Hannah, Fylki - Hallgrímur Jónasson, Keflavík.

Miðja: Marko Kotilainen, Keflavík - Grétar Hjartarson, KR - Baldur Aðalsteinsson, Val.

Sókn: Matthías Guðmundsson, FH - Helgi Sigurðsson, Val - Björgólfur Takefusa, KR.