Avril Lavigne í góðu hjónabandi

Söngkonan Avril Lavigne segir í viðtali við tímaritið Jane að það besta sem hafi komið fyrir eiginmann sinn, Deryck Whibley söngvara hljómsveitarinnar Sum 41, hafi verið að kynnast sér. Þrátt fyrir að þau séu bæði frægir rokkarar eigi þau í góðu sambandi hvort við annað.

Avril segir að þegar Deryck sé á tónleikaferðalögum hafi hún engar áhyggjur af honum. Þau eigi í mjög góðu og sterku hjónabandi og treysti hvort öðru fullkomlega.

Avril og Deryck giftu sig í júlí á síðasta ári. Þrátt fyrir að þau séu bæði miklir rokkarar var brúðkaupið hefðbundið og voru 110 gestir viðstaddir. Avril segir að fólk hafi búist við rokkuðu brúðkaupi með svörtum brúðarkjól en hún vildi hefðbundið brúðkaup svo hún gæti horft á myndir frá því mörgum árum seinna og ekki þurft að skammast sín fyrir of rokkað útlit.