PS3 kemur til Evrópu 23. mars

Sala á PlayStation 3, nýjustu leikjatölvunni frá Sony, hefst í Evrópu 23. mars næstkomandi. Leikjatölvan kom á markað í Japan og Bandaríkjunum í nóvember í fyrra. Einungis dýrari gerðir leikjatölvunnar verða í boði fyrst um sinn en ódýrari gerðir hennar koma á markað síðar í Evrópu.

Ástæðan fyrir því að tölvan kemur á markað í Evrópu mun síðar en í Bandaríkjunum og í Japan er sú að Sony átti í vandræðum með framleiðslu á Blu-ray diskadrifi tölvunnar, sem á að samræmast stöðlum Evrópusambandsins. Leikjatölvuunnendur í Evrópu sem ekki gátu setið á sér brugðust við með ýmsum hætti, meðal annars með því að láta senda sér tölvuna. Evrópusambandið brást illa við og hótaði aðgerðum til að hindra innflutninginn auk þess sem Sony sendi frá sér tilkynningu þess efnis að leikjatölvurnar sem komi á markað í Evrópu í mars muni ekki geta spilað leiki sem seldir eru í Bandaríkjunum og Japan. Sömu sögu var að segja af leikjunum.

Breska ríkisútvarpið, BBC, segir verðið á leikjatölvunni verða um 599 evrur, jafnvirði 53.500 íslenskra króna.

Um ein milljón leikjatölva verður í fyrstu sendingunni frá Sony þegar markaðssetningin hefst í mars. Gert er ráð fyrir því að um fjórðungur tölvanna fari á markað í Bretlandi. Þá koma 30 leikir fyrir tölvuna á markað í Evrópu á sama tíma.

Í dýrari gerð leikjatölvunnar er 60 GB harður diskur og þráðlaus tenging en í ódýrari gerðinni er harði diskurinn 20 GB og snúrur. Báðar gerðir eru hins vegar með þráðlausri fjarstýringu.