Hæstiréttur þyngdi dóm yfir nauðgara

Hæstiréttur dæmdi í gær Stefán Hjaltested Ófeigsson til tveggja ára hegningarauka fyrir nauðgun, og þyngdi Hæstiréttur þar með dóm Héraðsdóms Reykjavíkur um sex mánuði. Stefán fékk samanlagt fjögurra og hálfs árs fangelsisdóm fyrir tvær nauðganir.

Í dómi Hæstaréttar segir að sýnt hafi verið fram á að Stefán hafi á heimili sínu haft kynmök við konu sem lagði fram kæru á hendur honum. Það hafi hann gert gegn vilja hennar með valdbeitingu.

Nauðgunin átti sér stað í lok maí eða byrjun júní 2004, en konan sagðist muna atburði kvöldsins slitrótt, og grunaði að henni hafi verið gefið lyf. Það taldist þó ekki sannað.

Konan kærði árásina seint í desember 2005. Hún sagði lögreglu að hún hefði ekki treyst sér til að kæra fyrr þar sem henni hafi ekki fundist hún hafa neitt í höndunum, auk þess sem hún hafi verið full sjálfsásökunar.

Önnur kona kærði Stefán fyrir nauðgun í október 2004, og var hann dæmdur í tveggja og hálfs árs fangelsi í héraðsdómi í nóvember 2005, sem Hæstiréttur staðfesti í júní 2006.

Fram kemur í dómi héraðsdóms sem Hæstiréttur staðfesti í gær, að Stefán hafi sagt samfarir hafa farið fram með samþykki konunnar, og að kæra konunnar væri eingöngu til komin vegna fjölmiðlaumfjöllunnar um fyrra málið.

Þar sem Stefán hafði áður verið dæmdur fyrir sams konar brot var hann í gær dæmdur til refsiauka. Auk tveggja ára fangelsisvistar var Stefán dæmdur til að greiða fórnarlambi sínu eina milljón króna í skaðabætur. Hann var einnig dæmdur til að greiða sakar- og áfrýjunarkostnað í málinu, alls tæplega 1,2 milljónir króna.

Vitni báru fyrir dómi að konan hefði hlotið áverka vegna árásar Stefáns. Sjálf lýsti konan því að hann hafi ítrekað slegið hana í mjaðmir og brjóst. Stefán viðurkenndi að hafa slegið konuna, en sagði það hafa verið hluta af leiknum.

Dómurinn taldi frásögn konunnar trúverðuga, og hún styddist við líkamlega áverka, lostástand og andlega erfiðleika í kjölfar árásarinnar. Í hinum staðfesta dómi héraðsdóms segir að árásin hafi verið alvarleg, og að Stefán eigi sér engar málsbætur.