Jónas Guðni í KR

Jónas Guðni Sævarsson mun í dag ganga til liðs við KR samkvæmt heimildum Vísis.

Hann hefur leikið með Keflavík undanfarin ár og hefur þótt með betri miðvallarleikmönnum deildarinnar. Fjöldi liða hafa verið á höttunum eftir Jónasi en hann ákvað á endanum að ganga til liðs við KR.

Heimildir Vísis herma að KR hafi greitt allt að fimm milljónir króna fyrir leikmanninn.

Jónas á að baki 113 leiki með Keflavík í deild og bikar og hefur hann skorað í þeim þrjú mörk.

KR mun halda blaðamannafund klukkan 15.00 í dag þar sem þetta verður væntanlega tilkynnt.