Ó, þú skrínlagða heimska ...

Aðdragandi íbúakosningar um risaálver í Hafnarfirði við hlið þess gamla hefur afhjúpað enn frekar en orðið var brotalamirnar í Samfylkingunni sem stjórnmálaflokki. Flokkurinn treystir sér ekki til að taka opinbera afstöðu til málsins eða eins og forseti bæjarstjórnarinnar segir í Fréttablaðinu 21. mars:

„Við viljum gefa bæjarbúum frelsi til að nýta sér atkvæðisréttinn án þess að þurfa að lúta leiðsögn félagsins eða hinna kjörnu fulltrúa.“ Menn hljóta að spyrja til hvers sé flokkur og forysta sem ekki hefur skoðun á svo afdrifaríkri ákvörðun fyrir sitt sveitarfélag? Slík „leiðsögn“ þyrfti að sjálfsögðu ekki að koma í veg fyrir skoðanakönnun um málið meðal íbúanna en við blasir að hún er ekki annað en illa dulbúinn feluleikur.

Lúðvík Geirsson, Gunnar Svavarsson og Tryggvi Harðarson beita sér leynt og ljóst fyrir fabrikkunni, sá síðastnefndi með þeim snilldarrökum að jafnt andstæðingar hennar sem fylgjendur geti sagt já í mánaðarlokin.

Ekki tekur betra við þegar formaður Samfylkingarinnar reynir í Morgunblaðsgrein 21. mars að varpa ljósi á afstöðu flokks síns.

Einnig þar er enga skoðun að finna þrátt fyrir Fagra Ísland og aðra sýndarafstöðu til stóriðjumála. Fari svo að Alcan nái að beygja Hafnfirðinga undir sinn veldissprota með blíðmælgi og hótunum lofar Ingibjörg formaður því að greiða úr því sem á vantar með „viðræðum milli allra þeirra aðila sem eiga þátt í undirbúningi stækkunar álversins í Straumsvík“.

Það er ekki amalegt fyrir felumennina heimafyrir að eiga von á slíkri ljósmóður til að allt komist á koppinn í nafni lýðræðisins.

Formaður Samfylkingarinnar og oddvitinn í Hafnarfirði opinbera í ofangreindum pistlum hvernig flokkur þeirra leggst nú á eitt með Alcan að ná sér þóknanlegri niðurstöðu. Við lesturinn rifjuðust upp ljóðlínur úr Landsýn eftir Stein Steinarr. Hafnfirðingar hafa brátt í hendi sér hvort niðurlagið verður að hætti skáldsins.

Höfundur er líffræðingur og fyrrverandi ráðherra.