Reiknað með að gengið veikist til ársloka

Greining Glitnis reiknar með að gengi krónunnar muni veikjast fram að áramótum. Spáð er að vísitalan verði að meðaltali 121 stig úr mánuðinn.

Í Morgunkorni Glitnis segir að gengi krónunnar hafi átt undir högg að sækja í núverandi umhverfi lausafjárvanda og þverrandi áhættusækni undanfarnar vikur. Reikna má með því að þetta ástand muni a.m.k. vera viðvarandi út árið.

Í ljósi þess gerir greiningin ráð fyrir að gengi krónunnar lækki í desember. Spáir því að gengisvísitalan standi að meðaltali í 121 þennan síðasta mánuð ársins.

"Við teljum að skilyrði á erlendum fjármálamörkuðum muni áfram ráða þróun gengis krónu þegar kemur fram á nýtt ár. Vandasamt er að tímasetja hvenær dregur úr óvissu vegna lausafjárvandans og áhættusækni fjárfesta fer að aukast á ný," segir í Morgunkorni.

"Við teljum þó að líklegt sé að það eigi sér stað þegar árslokauppgjör stórfyrirtækja verða birt. Meiri upplýsingar munu draga úr óvissunni. Við teljum að í kjölfarið geti gengi krónunnar hækkað. Spáum við því að dollarinn fari lægst í 59 krónur á vormánuðum og evran í tæpar 87 krónur."