Ásókn í evrur eykst til muna milli ára

„Hér liggja fyrir óafgreiddar umsóknir 53 félaga,“ segir Guðmundur Guðbjarnason, forstöðumaður Ársreikningaskrár hjá Ríkisskattstjóra um ásókn fyrirtækja í að færa ársreikninga og gera upp í erlendri mynt. Hann segir slíkan fjölda alveg einstakan og augljóst að ásókn í að gera upp í erlendri mynt sé stóraukin.

„Hafa ber þó í huga að þarna er mikið af dóttur­fyrirtækjum. En töluvert er um það að stofnuð séu dótturfélög utan um erlendar eignir samstæðu og tekjur af þeim. Þetta er dálítið áberandi núna, þannig að 53 félög segja ekki alveg rétta sögu,“ bætir Guðmundur við.

Þegar hafa verið afgreiddar á árinu umsóknir 29 félaga hjá Ársreikningaskrá. Um síðustu áramót höfðu 167 félög heimild til að gera upp í erlendri mynt. Tæp 60 prósent þeirra félaga gerði upp í Bandaríkjadal og tæpur þriðjungur í evrum. Ári áður var evran með tæplega fjórðungshlutdeild. Miðað við fjölgun ársins og hlutföll gjaldmiðla í fyrirliggjandi umsóknum má hins vegar gera ráð fyrir að hlutdeild evru í uppgjöri fyrirtækja sem færa reikninga í erlendri mynt verði nálægt 45 prósentum.

Af þeim umsóknum sem eftir á að afgreiða hjá Ársreikningaskrá vilja um 85 prósent færa reikninga sína í evrum. „Evran er þarna mjög áberandi, en 45 sækja um hana og átta um aðra mynt,“ segir Guðmundur og bætir við að þarna sé nokkur breyting frá því sem áður var. „Dollarinn var nokkuð algengur í heildina.“

Guðmundur segir hins vegar ekki hægt að segja fyrir um það strax hverjir komist í gegn um nálar­augað hjá stofnuninni og því liggi hlutföll gjaldmiðla ekki endanlega fyrir. „Það er kannski ekki mikið um það, en kemur auðvitað fyrir að fyrirtæki uppfylli ekki skilyrði laganna,“ segir hann og vísar þar til ákvæða í áttundu grein laga um ársreikninga um heimild til færslu reikninga í erlendri mynt. Fái félögin 53 öll heimild Ársreikningaskrár til að færa reikninga í erlendri mynt fjölgar félögum með slíka heimild um 82 á þessu ári og verða 249 um áramót.