Glitnir er næststærsti miðlari Norðurlanda

Óli Kristján Ármannsson

skrifar

Glitnir er annar stærsti miðlarinn á norrænum verðbréfamarkaði á fyrsta fjórðungi ársins eftir kaupin á finnska fyrirtækinu FIM Group, samkvæmt tölum sem OMX-kauphöllin og Oslóarkauphöllin (Oslo Børs) hafa birt.

Þegar horft er til veltu hlutabréfa hefur markaðshlutdeild Glitnis aukist úr 0,8 prósentum á fyrsta ársfjórðungi síðasta árs í 6,05 prósent á fyrsta ársfjórðungi þessa árs, sem er hátt í áttföldun.

Mikinn vöxt Glitnis á norrænum verðbréfamarkaði má bæði rekja til innri vaxtar og kaupa á fyrirtækjunum Norse Securities, Fischer Partners og FIM Group, en yfirtökutilboði í FIM Group lýkur núna 16. maí. Samkvæmt upplýsingum frá Glitni nemur samanlögð markaðshlutdeild Glitnis og FIM á fyrsta fjórðungi ársins 26 prósentum hér á landi, 6,66 prósentum í Finnlandi, 6,28 prósentum í Svíþjóð, 5,63 prósentum í Noregi og 3,24 prósentum í Danmörku.

Frank Ove Reite, framkvæmdastjóri markaðsviðskipta Glitnis, segir sterka stöðu á verðbréfamarkaði efla bankann sem leiðandi fjármálafyrirtæki og leggja grunn að frekari vexti og arðsemi. „Fyrirtækja­kaupin hafa aukið við vöruframboð og auðveldað aðgang viðskiptavina Glitnis inn á norræna markaðinn auk þess að opna leið inn á nýja og ört vaxandi markaði. Eftir kaupin á FIM mun Glitnir vaxa og eflast enn frekar á sviði verðbréfaviðskipta og fyrirtækjaráðgjafar,“ segir hann og bendir á að nú séu 55 fyrirtækjaráðgjafar á vegum Glitnis í fimm löndum, sem efli mjög stöðu bankans á þeim vettvangi innan Norðurlandanna.

„Sérfræðiþekking FIM á nýmörkuðum og sterk staða Glitnis á norrænum fjármálamarkaði mun skapa fjölda nýrra tækifæra fyrir bankann,“ segir hann og bætir við að stefna bankans sé að vera áfram í forystusveit veltumestu fjármálafyrirtækja á norræna markaðnum.

Töluverður gangur hefur verið í norrænum kauphöllum að undanförnu. Þannig voru í síðasta mánuði slegin nokkur veltumet í OMX-kauphöllunum. Veltumesti dagurinn í sögu kauphallanna var 26. apríl. Þá nam veltan 795,5 milljörðum íslenskra króna, en fyrra met var af fyrsta fjórðungi þessa árs, síðan 28. febrúar þegar veltan nam 758,6 milljörðum. Fjöldi viðskipta hefur að sama skapi aukist en á meðaldegi í síðasta mánuði fóru fram um 172 þúsund viðskipti, miðað við 143 þúsund síðustu tólf mánuðina á undan. Frank Reite segir horfur á því að viðskipti haldi áfram að vera lífleg á markaðnum. „Og það kemur sér vel fyrir okkur,“ segir hann glaðbeittur.