Eignast meiri­hluta í Streifene­der

 Í tilkynningu frá Emblu Medical segir að Streifeneder sé alþjóðlegur framleiðandi og dreifiaðili stoð- og stuðningstækja með um hundrað starfsmenn.

„Á árinu 2024 nam sala Streifeneder um 25 milljónum evra (3,7 milljörðum íslenskra króna). Um 70% af tekjum félagsins koma frá stoðtækjum, íhlutum fyrir stoðtæki og stuðningsvörur. Megnið af sölu fyrirtækisins fer fram í Þýskalandi, en einnig er umtalsverð dreifing til annarra Evrópulanda, auk Ameríku og Asíu.

Útgáfa hlutabréfa

Stjórn Emblu Medical hefur ákveðið að nýta heimild í fimmtu grein samþykkta félagsins til að gefa út 2,805,135 nýja hluti í Emblu Medical og þar með hækka heildarhlutafé um 0.7%, úr 427,636,122 íslenskra króna að nafnverði í 430,441,257 ISK. Áskriftarverð hvers hlutar er 33.26 danskar krónur og nemur því heildarvirði hlutafjárhækkunarinnar 93 milljónum danskra króna (12.5 milljónum evra). Hluthafar Streifeneder ortho.production munu skrá sig fyrir öllum útgefnum hlutum,“ segir í tilkynningunni. 

Haft er eftir Sveini Sölvasyni, forstjóra Emblu Medical, að kaupin á Streifeneder falli vel að vaxstarstefnu félagsins og geri því kleift að ná til fleiri sjúklinga með breiðara vöruúrvali og heildarlausnum á stoðtækjamarkaði. „Auk þess styrkjum við stöðu okkar á lykilmörkuðum sem og nýjum markaðssvæðum. Sameiginlegt vöruframboð undir merkjum Össurar og Streifeneder mun nýtast bæði viðskiptavinum og sjúklingum um allan heim,” segir Sveinn. 

Í tilkynningunni segir að kaupin hafi ekki áhrif á fjárhagsáætlun Emblu Medical fyrir árið 2025.