Ég er opinn fyrir öllu

Landsliðsfyrirliðinn og fyrirliði Keflavíkur, Magnús Þór Gunnarsson, segir ekki víst að hann verði áfram í herbúðum Keflvíkinga næsta vetur en Magnús er samningslaus.

„Ég er að skoða mín mál þessa dagana og hef ekki tekið neinar ákvarðanir með framtíðina," sagði Magnús Þór í samtali við Fréttablaðið frá Baltimore í gær. Hann er með tilboð frá Keflavík í höndunum en ekkert annað félag hefur borið víurnar í hann enn sem komið er.

„Það er ekkert víst að ég verði áfram hjá Keflavík. Ég er opinn fyrir öllu og gæti verið til í að prófa eitthvað nýtt. Skiptir engu hvort það er á Suðurnesjunum eða í bænum," sagði Magnús.