Náðu ekki að halda í við heima­liðið í fyrsta leik EM

Íslenska U18 landslið kvenna í körfubolta spilaði sinn fyrsta leik á EM U18 í dag. Íslenska liðið er í B-deild Evrópumótsins en hún er spiluð í Rúmeníu. Fyrsti leikur íslenska liðsins var í dag gegn heimakonum sem var sterkur andstæðingur.

Strax í byrjun var rúmenska liðið með yfirhöndina en íslenska liðið náði að minnka muninn í öðrum leikhluta og var Rúmenía aðeins með níu stiga forskot í hálfleik, 49-40.

Í seinni hálfleik sýndi rúmenska liðið mikla yfirburði og átti það íslenska í miklum erfiðleikum með að halda í við heimaliðið. Leikurinn endaði með 27 stiga sigri Rúmeníu 100-73.

Sara Logadóttir var stigahæst í liði Íslands með tuttugu stig. Rebekka Steingrímsdóttir var stutt á eftir henni með nítján stig. Hulda Agnarsdóttir átti einnig flottan leik þar sem hún skoraði þrettán stig, tók átta fráköst og gaf sex stoðsendingar.

Næsti leikur íslenska liðsins er gegn Portúgal sem er í efsta sæti riðilsins. Portúgal er búið að vinna báða sína leiki og má því búast við erfiðum leik á morgun.