Páll Gísli hetja Skagamanna í Árbænum

Fylkir og ÍA gerðu 2-2 jafntefli í Árbænum í fyrsta leik dagsins í Landsbankadeildinni. Dramatíkin var mikil í leiknum og David Hannah misnotaði vítaspyrnu í uppbótartíma þegar Páll Gísli Jónsson varði frá honum. Fylkismenn léku manni færri frá 20. mínútu þegar Peter Gravesen var vikið af leikvelli.

Jón Vilhelm Ákason kom Skagamönnum yfir í leiknum á 36. mínútu en skömmu síðar jafnaði Valur Fannar Gíslason metin fyrir Fylki. Vejekoslav Savadjumovic kom Skagamönnum aftur yfir þegar 20 mínútur lifðu leiks, en Christian Christiansen prjónaði sig í gegn um vörn Skagamanna og jafnaði á 82. mínútu. Það var svo markvörðurinn Páll Jónsson sem var hetja gestanna sem sluppu með skrekkinn þegar hann varði vítaspyrnu David Hannah þegar rúmar tvær mínútur voru komnar fram yfir venjulegan leiktíma.