Hneykslaður á tilboði Tottenham

Paul Jewell hjá Wigan hefur staðfest að Tottenham hafi spurst fyrir um bakvörðinn Pascal Chimbonda strax eftir lokaleikinn í ensku úrvalsdeildinni um síðustu helgi, en var hneykslaður yfir þeirri upphæð sem Lundúnaliðið bauð í hann. Chimbonda er nær örugglega talinn vera á förum frá Wigan í sumar.

"Jú, ég get staðfest að Tottenham spurðist fyrir um hann, en ég held að þeir hafi verið að hugsa um að bjóða einhverjar tvær milljónir punda í hann. Það má vel vera að einhverjir viti það ekki, en Pascal var í liði ársins í úrvalsdeildinni - og ef þú færð einhvern af þeim leikmönnum fyrir tvær milljónir, held ég að þú sért vel rúmlega starfi þínu vaxinn," sagði Jewell kuldalega og vill eflaust fá miklu hærra verð fyrir hinn 27 ára gamla leikmann.