Frá Kenzo til Kaupmannahafnar

Jóhanna Jóhannesdóttir hefur búið í Kaupmannahöfn í ein sjö ár og hefur verið iðin við kolann síðan hún hélt út. Í apríl opnaði hún ásamt sjö öðrum stelpum fataverslun og verkstæði sem ber nafnið Mogetoj og er staðsett rétt hjá Nörreport-járnbrautarstöðinni.

Í þessum hópi er önnur íslensk stelpa sem heitir Guðbjörg Reykjalín sem hannar undir merkinu Greykjalín. Jóhanna er útskrifuð úr skólanum Håndarbejdets Fremme í Kaupmannahöfn og er því lærður handavinnukennari fyrir fullorðna eins og það heitir á dönsku.

"Þetta er búið að vera skemmtilegt ævintýri og búðin hefur gengið vonum framar," segir Jóhanna en hún selurð tvær línur í búðinni sem heita Mjaw og Goodlife. "Mjaw er svona götufatnaður fyrir stráka og stelpur frá 18 til 25 ára. Við erum tvær stelpur saman að hanna fyrir það merki," segir Jóhanna en Goodlife er hennar eigið merki þar sem hver einasta flík er einstök og bara framleitt eitt eintak af hverri flík. Jóhanna gerir allt sjálf og heklar til dæmis mikið töskur og fylgihluti.

Jóhanna hefur selt vörur sínar hjá Rögnu Fróða hérlendis og svo gerðist hún svo fræg komast í verknám hjá tískuhúsi Kenzo í París. "Það var skemmtileg tilviljun og það var Emiliana Torrini vinkona mín sem reddaði þessu fyrir mig. Vinur hennar var að vinna hjá Kenzo og vantaði nema þannig að hún benti á mig og ég fór út í þrjá mánuði," segir Jóhanna en hún var aðallega í því að hekla peysur fyrir vetrarlínu Kenzo sem komin er í búðir núna og hefur sést á tískupöllum út allan heim.