Flugbraut verður opnuð í Keflavík

keflavíkurflugvöllur Öryggismál Keflavíkurflugvallar voru í brennidepli á fundi Félags íslenskra atvinnuflugmanna, FÍA, á Hótel Nordica í gær. Á fundinum kom fram að unnið yrði að því í náinni framtíð að opna aftur flugbrautina 07/25 í tengslum við það þegar sambærilegri braut á Reykjavíkurflugvelli yrði lokað.

Jóhannes Bjarni Guðmundsson, varaformaður FÍA, segir að eftir fundinn hafi ríkt mikil ánægja með þessi orð samgönguráðherra en hann lýsti yfir að hann hygðist vinna að því í náinni framtíð að opna aftur þessa flugbraut. „Við höfum lagt áherslu á að ein svona braut sé til staðar á suðvestur-horninu, sérstaklega fyrir innanlandsflugið," segir Jóhannes.

Kostnaður við opnun flugbrautarinnar er talinn nema 200-250 milljónum króna. Jóhannes segir að yfirlag brautarinnar sé gott og brautin í rauninni tilbúin en kostnaðurinn tengist fyrst og fremst aðflugsbúnaði og raflögnum. Þetta hafi setið á hakanum þegar raflagnir voru endurnýjaðar á vellinum fyrir nokkrum árum.

Á fundinum kom fram að öryggismál yrðu í góðu lagi þó að varnarliðið hefði farið og vel yrði hugsað um alla flugrekstrarlega þætti, til dæmis hreinsun brauta, mönnun og tækjabúnað hjá slökkviliðinu. Ekki yrði slegið af kröfum eða öryggisstöðlum. Þá kom fram í máli samgönguráðherra að völlurinn færi undir samgönguráðuneytið en ekki hefði verið hvenær það yrði. „Eftir þessa breytingu er hægt að hugsa flugvellina í einni heild og undir einum hatti," segir Jóhannes.

„Það er óásættanlegt að dregið sé úr kröfum og staðlar lækkaðir við þær breytingar sem nú eru á Keflavíkurflugvelli. Borgaralegt farþegaflug á ekki að búa við lakari skilyrði en hernaðarflugið áður og má þá eins og áður benda á staðsetningu Keflavíkurflugvallar á miðju Atlantshafinu langt frá öðrum vara- og neyðarflugvöllum," segir hann.

Flugstöðin hefur verið stækkuð fyrir milljarða króna upp á síðkastið.

„Þessar framkvæmdir mega samt ekki verða til þess að ekki fáist nægjanlegt fjármagn til að halda uppi hæsta öryggisstaðli við rekstur og þjónustu við flugumferð við jafn krefjandi aðstæður," segir Jóhannes.