Stríð gegn hryðjuverkum notað sem skálkasjól til hlerana

Ólafur Hannibalsson segir í uppsiglingu að stríðið gegn hryðjuverkum verði notað með sama hætti og kalda stríðið, til að afsaka hleranir á símum fólks. Bæði heima- og vinnusími föður hans voru hleraðir þegar hann var þingmaður og forseti Alþýðusambandsins á sjöunda áratugnum.

Gögn frá Þjóðskjalasafninu staðfesta að símar Hannibals Valdimarssonar voru hleraðir árið 1961 og ekki er tilgreint hvað þær hleranir stóðu lengi. Ólafur, sonur Hannibals, segir rökstuðning dómsmálaráðuneytisins fyrir hlerununum mjög óljósan.

Ólafur segir að í beiðni dómsmálaráðuneytisins um hlerarnirnar á sínum tíma, sé talað um að heitar umræður séu í þjóðfélaginu og hótanir liggi nánast í loftinu um valdbeitingu sem geti ógnað öryggi ríkisins.

Á þessum tíma stóðu yfir heitar deilur á Alþingi um samninginn um 12 mílna fiskveiðilögsögu Íslands og greinilegt að ráðmenn vildu vita hvað Hannibal hafði að segja í síma Alþýðusambandsins og heimasíma sinn. En Hannibal var þá þingmaður Alþýðubandalagsins og hafði verið félagsmálaráðherra í ríkisstjórn sem sat á undan þáverandi stjórn Alþýðuflokks og Sjálfstæðisflokks - viðreisninni. Hannibal þótti róttækur og hafði m.a. verið fluttur í böndum frá Bolungarvík til Ísafjarðar árið 1932 vegna afskipta hans af verkalýðsmálum.

Ólafur segir að það geti vel verið að stjórnvöld hafi haft ástæðu til að óttast stjórnmálamanninn Hannibal Valdimarsson, en málið snúist ekki um það. "Málið snýst um grundvallarréttindi allra borgara í þessu þjóðfélagi, að þeir geti óhultir talað í sína síma og átt sín símtöl eins og þau séu innan fjögurra veggja. Þar við bætist að hann átti rétt sem þingmaður á þinghelgi," segir Ólafur.

Gögnin sem Þjóðskjalasafnið hefur afhent Ólafi eru afrit af bréfi dómsmálaráðuneytisins, þar sem farið er fram á úrskurð um hleranir á símum Hannibals og afrit af úrskurði sakadómarans. Ólafur segir að allra leiða verði leitað til að fá öll gögn um þessar hleranir og bakgrunn þeirra upp á yfirborðið.

"Við viljum fá að vita hverjir framkvæmdu hlerarnirnar, hvar þær voru framkvæmdar og hvað þær stóðu lengi," segir Ólafur. Þá segir hann nauðsynlegt að fá upplýst hvert hlerararnir fóru með sínar upplýsingar, til hvaða manna og hvort málið hafi e.t.v. náð út fyrir landsteinana. Þar segist Ólafur eiga við, hvort upplýsingunum hafi verið miðlað til erlendra ríkja.

Ólafur telur ástæðu til að óttast að stjórnvöld í dag beiti svipuðum vinnubrögðum. Nú sé í uppsiglingu að nota s.k. stríð gegn hryðjuverkum á svipaðan hátt og kalda stríðið. "Þannig að enginn megi vera óhultur fyrir föðurlegri umsjá ríkisvaldsins, þannig að þeir geti farið inn í síma hvenær sem er og hvar sem er," segir Ólafur Hannibalsson.