Fuglaflensa í Póllandi

Tveir dauðir svanir sýktir af H5N1-afbrigðinu fundust í Norður-Póllandi á dögunum. Pólskir fjölmiðlar greindu frá þessu í morgun. Rannsóknarstofan sem greindi sýnin hefur þó ekki staðfest þetta. Ef satt reynist eru þetta fyrstu tilfelli veirunnar í Póllandi.

Milljónum fugla hefur verið slátrað í Írak til að hefta útbreiðslu fuglaflensunnar þar. Heilbrigðisyfirvöld í Nasiryah-héraði í Írak hafa byrjað herferð gegn flensunni en dýralæknir þar hefur staðfest að einn sýktur fugl hafi fundist. Sýni úr öðrum fuglum á svæðinu hafa reynst neikvæð.

Grunur leikur á að 18 ára stúlka úr héraðinu hafi látist af hinu hættulega H5N1 afbrigði veirunnar. Sýni hafa verið tekin og niðurstaðna er að vænt eftir tvær vikur. Að minnsta kosti tveir aðrir hafa látist úr fuglaflensu í Írak síðan í byrjun árs.

Kínverjar hafa hætt sölu á lifandi fuglum til Hong Kong í þrjár vikur. Kínverska heilbrigðisráðuneytið tók ákvörðun um þetta eftir að maður lést af völdum flensunnar í Guangdong-héraði í Kína. Níu hafa látist úr fuglaflensu þar í landi en fimmtán sýkst. Ef engin fleiri tilfelli greinast í mönnum á meginlandi Kína verður innflutningur á lifandi fuglum leyfður á ný.