Síðasti bærinn hreppti ekki hnossið

Íslenska stuttmyndin Síðasti bærinn eftir Rúnar Rúnarsson hreppti ekki hnossið á Óskarsverðlaunahátíðinni í Los Angeles í nótt. Stuttmyndin Six Shooter varð fyrir valinu. Engin ein mynd sópaði til sín verðlaunum á hátíðinni. Fjórar myndir fengu þrjú verðlaun og engin fleiri styttur en það. Öllum að óvöru var myndin Crash valin sú besta á síðasta ári.

Það voru myndirnar Brokeback Mountain, Crash, King Kong og Memoirs of a Geisha sem fengu þrenn Óskarsverðlaun í nótt, þær tvær síðast nefndu fyrir tæknivinnu og hönnun.

Flestir höfðu spáð því að kvikmyndi Brokeback Mountain, sem fjallar um samband tveggja samkynhneigðra kúreka, yrði valin besta myndin en svo varð ekki. Kvikmyndin Crash varð hins vegar fyrir valinu en hún hlaut einnig verðlaun fyrir frumsamið handrit og klippingu.

Aðstandendur Brokeback Mountain fóru þó ekki tómhentir heim. Leikstjórinn Ang Lee fékk verðlaun auk þess sem handritið, sem byggir á áður birtu efni, og tónlistin í myndinni voru sigursæl.

Philip Seymour Hoffman var valinn besti leikari í aðahlutverki fyrir túlkun sína á rithöfundinum Truman Capote í kvikmyndinni Capote.

Reese Witherspoon var valin besta leikkona í aðalhlutverki fyrir leik sinn í myndinni Walk the Line sem fjallar um ævi sveitasöngvarans Johnny Cash.

Hjartaknúsarinn George Clooney var valin besti aukaleikarinn fyrir framistöðu sína í myndinni Syriana og Rachel Weisz hlaut verðlaun sem besta aukaleikkonan í myndinni The Constant Gardener.