Flokkarnir lofa öldruðum í Reykjavík öllu fögru

Aldraðir í Reykjavík eiga í vændum betri tíð með blóm í haga, sama hvernig meirihlutinn í borgarstjórn Reykjavíkur verður eftir kosningar. Að minnsta kosti ef allir flokkarnir standa við stóru orðin.

Málefni aldraðra hafa mikið verið rædd í aðdraganda borgarstjórnarkosninganna síðustu daga og í sem fæstum orðum segjast allir flokkarnir sem bjóða fram í Reykjavík vilja gera nærri hvað sem er fyrir gamla fólkið.

Mörg hundruð eldri borgarar eru í brýnni þörf, þurfa hjúkrunarrými eða þjónustuíbúðir, -biðlistarnir eru langir, svo ljóst er að það þarf að byggja. Um þetta eru allir flokkarnir í borginni sammála, þótt ef til vill megi finna einhvern áherslumun á milli flokkanna um nákmæmlega hvað ,hvenær, eða hvernig á að gera það.

Bæta þarf verulega heimaþjónustu og heimahjúkrun, segja stjórnmálamenn úr öllum flokkum. Samfylkingarmenn segja samt brýnast af öllu að borgin taki við málaflokknum af ríkinu, og það hið snarasta. Vinstri grænir segja að vissulega þurfi að taka til hendinni en sama sé hvor geri þáð, ríki eða borg. Oddviti sjálfstæðismanna segir málaflokkinn reyndar vera að stærstum hluta hjá sveitarfélögunum nú þegar, en vill taka við restinni.

Samfylking, Framsókn og Vinstri grænir vilja skoða lækkun fasteignagjalda aldraðra á næsta kjörtímabili með jákvæðu hugarfari. Hins vegar hafa bæði Frjállyndir og Sjálfstæðismenn ákveðið lofað lækkun.