Allardyce mjög líklegur landsliðsþjálfari

Sir Alex Ferguson segir að Sam Allardyce, knattspyrnustjóri Bolton, sé mjög líklegur til að verða valinn eftirmaður Sven-Göran Eriksson hjá enska landsliðinu. Þetta sagði Ferguson á blaðamannafundi í dag fyrir viðureign Bolton og Manchester United á morgun.

"Ég held að Allardyce eigi frábæra möguleika á að verða næsti landsliðsþjálfari - ekki spurning," sagði Ferguson. "Ef þið skoðið bara þann árangur sem hann hefur náð við uppbyggingu Bolton-liðsins og hvernig hann hefur staðið að því. Það er kennslubókardæmi um hvernig menn ættu að standa að því að byggja upp lið og ég held að reynsla hans gæti komið enska landsliðinu vel," sagði Ferguson.