Reyklaus í tíu ár

Ég skrifa þessa stuttu grein til þess að þakka öllum þeim sem hafa treyst mér til að hjálpa sér að hætta að reykja á síðustu tíu árum.

Vegna mikilla anna við annað námskeiðahald og bókaskrif hef ég ákveðið að ljúka þjónustu minni við þá sem enn reykja (en vilja hætta) með námskeiði í byrjun janúar á næsta ári. Við það tækifæri held ég tíu ára afmælisnámskeið á Hótel Loftleiðum – en fyrsta reykleysisnámskeiðið mitt var haldið í litlum sal fyrir ofan Garðsapótek árið 1997. Síðan þá hefur mikið vatn runnið til sjávar.

Ég hef haldið tugi námskeiða fyrir einstaklinga og fyrirtæki um allt land, gefið út staðfestingaspjöld, gefið út bók (Þú getur hætt að reykja – Forlagið 2003), tekið námskeiðið upp á hljóðsnældur (ófáanlegt í dag) og skrifað fjöldann allan af greinum í blöð og tímarit.

Allan þennan tíma hef ég verið mjög virkur í forvarnastarfi og haldið fjölda fyrirlestra fyrir unglinga, foreldra og fyrirtæki. Starf mitt á þessu sviði hefur snert hundruð og jafnvel þúsundir Íslendinga.

Mín von er að það hafi skilað sér í bættri heilsu fjölda fólks og jafnvel þótt það hefði ekki gert annað en að lengja eitt mannslíf um nokkur ár var það vel þess virði. Ég treysti því að aðrir hæfir aðilar haldi áfram að sinna þeim hópi sem enn reykir og vill hætta.

Mín persónulega uppskera á þessum tíu árum er reyklaust líf. Ég byrjaði að halda þessi námskeið sex mánuðum eftir að ég hætti að reykja til að styrkja sjálfan mig og aðra og get ekki hugsað mér að snúa aftur.

Ég var að skoða mynd af mér um daginn þar sem ég stóð með sígarettu í munninum og ég hugsaði með sjálfum mér: „Hver er þessi maður?“