Búa til risa í norrænum ferðaþjónustuiðnaði

FL selur Sterling til Northern Travel Holding og tekur hlut í því ásamt Fons og Sundi. Iceland Express, Astraeus og Ticket renna einnig inn í NTH. Innan vébanda þess er stærsta lággjaldaflugfélag Norðurlanda og stærsta ferðaskrifstofukeðjan.

Horft til skráningar árið 2008 eða 2009.

FL Group hefur selt allan hlut sinn í Sterling, stærsta lággjaldaflugfélagi Norðurlanda, til Northern Travel Holding, eignarhaldsfélags í ferðaþjónustu, fyrir tuttugu milljarða króna.

Kaupverðið er greitt með sex milljörðum króna í reiðufé og fjórtán milljörðum króna í formi láns frá seljanda til þriggja ára. Salan hefur óveruleg áhrif á afkomu FL.

Eigendur Northern Travel eru Fons eignarhaldsfélag, FL Group og Sund og verður hið nýja félag með ráðandi stöðu á flestum vígstöðvum í norrænum ferðaþjónustuiðnaði. Eigið fé Northern Travel er um 11,5 milljarðar króna, árleg heildarvelta er áætluð 120 milljarðar króna og flýgur félagið með 7,5 milljónir farþega.

Pálmi Haraldsson, stjórnarformaður Northern Travel og annar eiganda Fons, segir að endalausir möguleikar bíði hins nýja félags sem starfi á stóru en vannýttu markaðssvæði. „Það er alveg ljóst að þessi félög styðja við hvert annað, enda eru nokkur þeirra þau stærstu á sínu sviði á Norðurlöndum. Það eru 55 breiðþotur að fara frá Skandinavíu til Bangkok í hverri viku. Við erum ekki með eina einustu vél en samt er ég að selja 40 prósent af sætunum."

NTH tekur einnig yfir Iceland Express og Hekla Travel að öllu leyti, 51 prósents hlut í breska leiguflugfélaginu Astraeus og 29,26 prósenta hlut í Ticket, stærstu ferðaskrifstofukeðju Norðurlanda. Þessi bréf voru áður eigu Fons. Engar breytingar eru fyrirhugaðar á yfirstjórn dótturfélaganna.

Pálmi útilokar ekki skráningu á markað árið 2008 eða 2009. „Það er alveg ljóst að ef afkoman gengur eftir þá verður farið í skráningu til að ná í meira áhættufé og við getum haldið áfram að vaxa. Heimurinn er stór en Ísland er lítið."

Sterling og Maersk Air var bjargað af Fons úr miklum taprekstri snemma árið 2005. Pálmi sameinaði félögin undir merkjum Sterling og seldi það til FL Group fyrir fimmtán milljarða króna í október í fyrra. Hann segir fátt benda til annars en að viðsnúningur sem orðið hefur á rekstri Sterlings haldi áfram. „Ég sá mikið á eftir Sterling á sínum tíma því ég var alltaf með þessa mynd í huga. En stundum fær maður tilboð sem maður getur ekki hafnað." eggert@frettabladid.is