Eyþór Arnalds en ekki sjálfur David Bowie

„Changes dæmið? Já, þetta er Todmobile. Það er svona þegar tekið er á því. Þetta er „cover“ sem við vorum að leika okkur með. Svo hringdi Mogginn og bað um þetta lag og við töldum bara í,“ segir Þorvaldur Bjarni tónlistarmaður.

Morgunblaðið hefur lagst í mikla auglýsingaherferð eins og lýðum má ljóst vera. Og hefur nú um hríð keyrt sjónvarpsauglýsingu þar sem ýmsar ljósmyndir eru keyrðar og undir leikið hið þekkta lag David Bowies Changes. Ekki verður betur heyrt en þarna sé Bowie sjálfur á ferð en svo er ekki. Sá sem syngur er enginn annar en tónlistar- og stjórnmálamaðurinn Eyþór Arnalds. Og víst er að jafnvel þeir sem telja sig til hörðustu aðdáenda Bowies hafa látið blekkjast.

 

„Nei, þetta er nú ekki alveg nákvæm eftirlíking," hlær Þorvaldur Bjarni aðspurður. "En við berum fulla virðingu fyrir meistaranum. Þegar við höfum verið að taka Bowie-cover þá hefur Eyþór sungið það.“

Eftir að hafa hlustað á lagið í heild sinni kemur í ljós að Eyþór er Eyþór en ekki Bowie. Hins vegar í því broti lagsins sem notað er við auglýsinguna þá er erfitt að greina mun.

„Á köflum dettur þetta saman. Já, það er magnað hvað raddir þeirra eru líkar,“ segir Þorvaldur.

Hljómsveitin Todmobile er nú við upptökur á nýrri plötu og því var ekki málið að telja í Bowie slagarann góða. Saga Film framleiðir auglýsinguna fyrir Moggann en jafnframt eru til útgáfur við auglýsinguna lagið Changes í flutningi með Hermigervli og svo hljómsveitinni Reykjavík. Ekki fer á milli mála í þeim útgáfum að þar er ekki Bowie á ferð en öllu erfiðara að greina á milli útgáfu Todmobile og svo upprunalegu útgáfunnar.

„Þetta er snilldarpopp og ótrúlega gaman að taka þetta upp,“ segir Þorvaldur Bjarni.

Hann segir nokkuð algengt að Todmobile geri svona auglýsingar. Og nú, þegar hópurinn sé í hljóðveri að taka upp nýja plötu, hafi verið lófa lagið að renna í Changes. Þorvaldur segir vel ganga með hina nýju plötu Todmobile og sé verkefnið gríðarlega skemmtilegt