Fréttablaðið sýknað af kröfum Jónínu

"Þetta er mikill léttir fyrir íslenska fjölmiðlun," sagði Sigurjón M. Egilsson, fréttaritstjóri Fréttablaðsins, eftir að Hæstiréttur staðfesti sýknudóm Héraðsdóms Reykjavíkur í máli Jónínu Benediktsdóttur gegn 365 prentmiðlum og Kára Jónassyni, ritstjóra Fréttablaðsins.

Jónína Benediktsdóttir höfðaði mál eftir að hafa lagt fram kröfu hjá sýslumanninum í Reykjavík um staðfestingu á lögbanni sem hún fékk lagt á birtingu á hluta úr tölvupósti, sem verjandi Jónínu, Hróbjartur Jónatansson, hélt fram fyrir dómi að hefði verið fenginn með ólögmætum hætti úr tölvupósthólfi Jónínu.

Í dómi Hæstaréttar segir að lögbannskrafa Jónínu hafi verið of víðtæk. Jafnframt segir að umfjöllun Fréttablaðsins um aðdraganda Baugsmálsins hafi ekki gengið of nærri einkalífi Jónínu, þó greint hafi verið frá fjárhagsmálefnum hennar, þar sem þau hafi verið samofin fréttaefninu, sem varðaði almenning.

Hróbjartur Jónatansson, lögmaður Jónínu, sagði niðurstöðu Hæstaréttar hafa komið sér verulega á óvart. "Ég hef ekki enn farið nákvæmlega í gegnum dóminn og get því ekki tjáð mig um forsendur Hæstaréttar fyrir niðurstöðunni. Ég tel þetta vera mjög óheppilega niðurstöðu. Kjarni málsins finnst mér vera þessi; finnst fólki það í lagi að almenningur geti lesið einkatölvupóst sinn í fjölmiðlum? Ég held að flestir svari þeirri spurningu neitandi."

Jón Magnússon, lögmaður 365 prentmiðla og Kára Jónassonar, telur Hæstarétt hafa staðfest eðlileg vinnubrögð Fréttablaðsins í stóru fréttamáli. "Hæstiréttur segir í dómi sínum að miðað við hvernig efnistök Fréttablaðsins voru í málinu þá sé ekkert óeðlilegt við það hvernig fréttirnar af málinu voru unnar. Það þýðir, að það var í lagi að birta hluta úr tölvupóstunum sem um var rætt. Fréttaskrif um Baugsmálið voru eðlileg og réttmæt. Efni tölvupóstbréfanna hafði fréttagildi. Hæstiréttur segir því, að sú blaðamennska sem var viðhöfð, hafi verið til sóma."

Sigurjón M. Egilsson telur góð vinnubrögð Fréttablaðsins, við fréttaflutning á aðdraganda Baugsmálsins, hafa verið staðfest af Hæstarétti. "Ef lögbannið hefði verið staðfest hefðu blaðamenn átt það á hættu að vinnugögn þeirra yrðu sótt með ofbeldi, og það af þeim tekið. Það skiptir líka miklu máli að Hæstiréttur skuli staðfesta það að vinnubrögð okkar hafi verið góð, og að við röskuðum ekki friðhelgi Jónínu Benediktsdóttur."