Bandaríkjastjórn bindi enda á þjóðarmorð

Bandarískir kvikmyndaleikarinn George Clooney krafðist þess á blaðamannafundi í gær að ríkisstjórn Bandaríkjanna gerði allt sem hún gæti til að binda endi á þjóðarmorðin í Darfur-héraði í Súdan. Þá sagði Clooney almenning einnig geta lagt sitt af mörkum.

George Bush Bandaríkjaforseti gaf í gær út tilskipun um að frysta skuli allar eignir og bankareikninga þeirra sem ógnað hafa friði og öryggi í Darfur-héraði í Súdan. Frestur sem Afríkusambandið gaf stríðandi fylkingum í Darfur til að semja frið rennur út á sunnudag. Uppreisnarmenn gripu til vopna fyrir þremur árum og sökuðu stjórnvöld um að vanrækja íbúa Darfur.

Stjórnvöld í Súdan eru sökuð um að hafa útvega Janjaweed-sveitum araba vopn til að berja uppreisnina niður, en Súdansstjórn neitar því alfarið. Janjaweed-sveitirnar eru sakaðar um morð, skipulagðar nauðganir og rán. Talið er að hundruð þúsund hafi fallið í átökunum og að yfir tvær miljónir manna hafi hrakist frá heimkynnum sínum, sumir yfir til grannríkisins Tjad.

Vegna átakanna í Darfur hafa hjálparsamtök ekki sinnt fólki sem þarf á hjálp að halda. „Við getum ekki snúið baki við þessu og vonað að þetta hverfi með einhverjum hætti. Ef við gerum það mun heil kynslóð fólks hverfa," sagði Clooney á blaðamannafundi, en hann heimsótti Darfur í vikunni. „Sagan mun dæma okkur," sagði Clooney og átti við Bandaríkin og alþjóðasamfélagið í heild.

Clooney sagði að almenningur yrði að láta betur í sér heyra og hvatti alla til að taka þátt í kröfugöngum sem fara eiga fram í San Francisco og Washington á sunnudag. Í fyrradag samþykkti öryggisráð Sameinuðu þjóðanna farbann og frystingu eigna fjögurra manna sem sakaðir eru um ódæðisverk í Darfur, súdansks herforingja, eins foringja sveita araba og tveggja forystumanna uppreisnarmanna.