Aldrei í vafa að Flateyri yrði endurbyggð

Tuttugu létust og stór hluti byggðarinnar þurrkaðist út þegar snjóflóðið féll. Þrátt fyrir það voru flestir heimamenn á því að Flateyri skyldi endurreist. Fyrir tíu árum vaknaði Magnea við að snjóflóð hafði fallið. Hún segir tilfinninguna hafa verið óraunverulega, en skelfilega.

Klukkan var sjö mínútur yfir fjögur að nóttu þegar snjóflóðið féll úr Skollahvilft og flestir íbúar sofandi í rúmum sínum, eða annars staðar þar sem þeir höfðu komið sér fyrir vegna snjóflóðahættu. 45 voru í nítján húsum sem flóðið féll á, 25 björguðust en tuttugu létu lífið. Hjálparstöð var komið upp í fiskvinnslustöðinni Kambi, þangað voru þeir sem slösuðust í flóðinu fluttir og hlúð að fólki. Heimamenn tóku til við að leita að þeim sem var saknað og bættist fljótlega hjálp nær 400 leitarmanna, lækna og hjúkrunarfólks.

Magnea Guðmundsdóttir, sem þá var oddviti sveitarstjórnar, var ein þeirra sem vöknuðu við það að snjóflóð hafði fallið á þorpið. Hún segir upplifunina hafa verið skelfilega. Hún hafi líka verið óraunveruleg, þetta hefði getað verið draumur en var ekki. Nú, tíu árum síðar, segir hún þakklæti ofarlega í huga sér, ekki síst þegar hún vaknaði á Flateyri í morgun, þakklæti til allra þeirra heimamanna sem tóku þegar til við hjálparstörf og þakklæti til allra þeirra sem komu til Flateyrar til að hjálpa.

Stór hluti byggðarinnar á Flateyri þurrkaðist út þegar snjóflóðin féllu. Magnea segist aldrei hafa verið í nokkrum vafa um að Flateyri yrði byggt upp á nýjan leik. Sjálf flutti hún þaðan fyrir fáeinum árum en kemur reglulega til baka og segir ánægjulegt hversu fallegt þorpið sé orðið aftur.

Íbúum Flateyrar hefur fækkað mjög síðan snjóflóðið féll. Þeir voru þrjú hundruð sjötíu og níu talsins fyrir tíu árum en hafa verið um og undir þrjú hundruð síðustu árin og stór hluti þeirra af erlendu bergi brotin.

Minningarathafnir verða haldnar í íþróttahúsinu á Flateyri og í Neskirkju í Reykjavík í kvöld.