Zola leggur skóna á hilluna

Hinn smái en knái knattspyrnusnillingur Gianfranco Zola er hættur knattspyrnuiðkun, nokkrum dögum fyrir 39 ára afmæli sitt, en hann gerði garðinn frægan hjá Chelsea á árum áður. Zola lék sín bestu ár fyrir Napoli, Parma og Chelsea, þar sem hann lék m.a. með Eiði Smára Guðjohnsen. "Ég ákvað að fara að sinna öðrum hlutum í lífi mínu, sem setið hafa á hakanum allt of lengi," sagði hinn smávaxni leikmaður, sem sýndi oft á tíðum frábæra spretti á Ítalíu á síðustu leiktíð sinni á atvinnumannsferlinum þrátt fyrir háan aldur.