Væri hægt að forða 9 þúsund mönnum frá dauða

Það væri hægt að forða níu þúsund Evrópubúum frá dauða á næstu árum með því að auka skatt á áfengi um tíu prósent í löndum Evrópusambandsins. Þetta eru niðurstöður nýrrar skýrslu sem heilbrigðissérfræðingar unnu fyrir sambandið. Drykkja ungmenna um alla álfuna hefur aukist verulega síðstliðinn áratug.

Og allt þetta áfengisþamb hefur sína fylgifiska. Í nærri öllum löndum Evrópusambandsins hafa slys sem rekja má beint til ölvunar aukist verulega. Fleiri ungar stúlkur verða óléttar án þess að það hafi verið ætlunin og það þykir ekki lengur saga til næsta bæjar að fólk á þrítugsaldri látist úr lifrarsjúkdómum.

Stjórnvöld í Bretlandi hafa glímt við þetta vandamál árum saman, en í suðurhluta Evrópu er vandinn nýr af nálinni.

Nefndir á vegum Evrópusambandsins vinna að tillögum til að ráða á þessu bót. Ný skýrsla sem unnin var fyrir framkvæmdastjórn ESB bendir til að ein leið gæti verið að hækka skatta á áfengi. Skýrsluhöfundar telja að hægt sé að koma í veg fyrir níu þúsund dauðsföll í álfunni á næstu árum með því að hækka áfengisskattinn um tíu prósent. Aðrar leiðir sem taldar eru vænlegar samkvæmt höfundum skýrlsunnar eru að fækka sölustöðum, stytta opnunartíma kráa og skemmtistaða og auka lágmarksaldur til kaupa á áfengi.