Verðstríð háð milli Byko og Húsasmiðjunnar

Byko og Húsasmiðjan há nú mikið verð- og auglýsingastríð. Nokkrar algengar vörutegundir sem fréttastofan kannaði verð á í dag voru í öllum tilfellum ódýrari í Byko.

Byko og Húsasmiðjan eru komin í stríð og auglýsa bæði fyrirtækin verðvernd. Auglýsingastofan Gott fólk sem vann fyrir Byko sakar Húsasmiðjuna um stuld á auglýsingaherferð og útilokar ekki að lögð verði fram kæra vegna málsins. Hugmynd fyrirtækjanna er sú sama; ef viðskiptavinirnir finna annars staðar ódýrari vöru en þeir hafa keypt hjá þessum fyrirtækjum geta þeir fengið endurgreitt innan 20 daga og að auki fá þeir 20% af mismuninum greiddan til baka. Fráttastofan gerði óvísindalega könnun á sex verkfærum og var þetta niðurstaðan.

Bahco hamar kostar í Byko 1.889 krónur en kostar í Húsasmiðjunni 2.245 krónur. Þá kostar Bahco bogasög einar 1.569 krónur í Byko en 1.580 í Húsasmiðjunni. 16 millimetra sporjárn kostar í Byko 1.210 krónur en kostar 1.295 krónur í Húsasmiðjunni og 635 mm kúbein kostar í Byko 4.295 krónur en 4.428 krónur í Húsasmiðjunni. Stanley málmband kostar í Byko 1.490 krónur en kostar í Húsasmiðjunni 1.595 krónur. Ekki var munurinn alltaf mikill en plast tommustokkur kostar í Byko 493 krónur en er tveimur krónum hærri í Húsasmiðjunni þar sem hann kostar nú 495 krónur.

Miðað við tilboð verslananna um endurgreiðslu, þá er það Húsasmiðjan sem þarf að endurgreiða viðskiptavinum sínum - að minnsta kosti þeim sem keyptu þær vörur sem við skoðuðum í dag.

Fréttastofan tekur þó fram að um óvísindalega könnun var að ræða.