Kaupir skip til loðnuveiða

Samherji hefur gengið frá kaupum á nótaveiðiskipinu Högabergi FD frá E.M.Shipping í Færeyjum, eftir því sem fram kemur á heimasíðu fyrirtækisins. Þetta er gert vegna mikillar aukningar á aflaheimildum á loðnu. Í kaupsamningi um skipið er ákvæði um endursölurétt innan þriggja mánaða frá undirritun. Högaberg, sem fær einkennisstafina EA-12, ber um 2.200 tonn af uppsjávarfiski og er útbúið bæði á nóta- og flottrollsveiðar. Skipið fór frá Færeyjum í nótt og er væntanlegt til Eskifjarðar í fyrramálið þar sem lokið verður við skráningu þess. Vonast er til að það takist að ljúka skráningunni á morgun svo að skipið geti haldið á veiðar án tafar.