Ísland er einkabílasamfélag

Auka á gjaldtöku fyrir bílastæði í borginni, dreifa vinnutíma fólks og ekki á að stækka vegakerfið frekar. Verkfræðingar, sem hafa skoðað samgöngur í Reykjavík í alþjóðlegu samhengi, segja að þetta myndi stórbæta umferðarmenningu í borginni. Tryggvi Jónsson og Þorsteinn Hermannson hjá Hönnun hafa unnið að úttekt á samgöngukerfi Reykjavíkur í alþjóðlegu samhengi fyrir Reykjavíkurborg. Þeir segja ástandið þannig að hér sé einkabílasamfélag. Yfirleitt sé einn í bíl og allir að fara á sama tíma. Það orsaki mikla umferðatoppa á morgnana og seinni part dags. Árið 1996 var fjöldi einkabíla á hverja þúsund íbúa í Reykjavík rúmlega 460 sem var um fimmtíu bílum meira en í Vestur-Evrópu. Á síðasta ári vorum við svo komin yfir meðal bílafjölda í Norður-Ameríku, eða 610 bíla á hverja þúsund íbúa. Tryggvi segir að taka verði ákvörðun um hvernig borg við viljum að Reykjavík verði. Viljum að Reykjavík verði eins og Atlanta og Houston í Bandaríkjunum þar sem öll samgönguvandamál eru leyst með einkabíl en í Houston eru götur sem eru fimmtán akreinar. Þegar almenningssamgöngur hér á landi eru bornar saman við aðrar borgir sést að Reykjavík er mjög svipuð og borgir í Bandaríkjunum. Við eigum langt í land með að ná borgum sem við miðum okkur oft við á Norðurlöndunum. Í kringum 50% ferða fólks í Kaupmannahöfn eru með einkabílum en hér á landi er fjöldi ferða með einkabílum allt að 70% til 80%. Ef við viljum ekki vera með borg eins og Houston og Texas þarf að mati Tryggva að fara í nokkuð óvinsælar aðgerðir. Ekki sé hægt að vera með ókeypis bílastæði vestan Kringlumýrarbrautar. Háskóli Íslands þarf að byrja á öðrum tíma en Háskólinn í Reykjavík og framhaldsskólarnir. Svo væri jafnvel hægt að fá Landsspítala Háskólasjúkrahús til að vera með vaktaskipti á öðrum tíma. Með þessu væri hægt að koma í veg fyrir að allir séu að ferðast á sama tíma klukkan átta á morgnana. Uppbygging Reykjavíkur svipar til bandaríkra borga þar 40% atvinnunnar er á frekar litlu svæði. Það þýðir mikil umferð á álagstímum þegar allir koma úr svo kölluðum svefnhverfum þar sem bara er íbúðabyggð.