Skyrslettumálið tekið fyrir

Fyrirtaka var í dag í Héraðsdómi Reykjavíkur í máli þeirra Ólafs Páls Sigurðssonar og Örnu Aspar Magnúsdóttir sem ákærð eru fyrir stórfelld eignaspjöll og húsbrot. Forsaga málsins er sú að þann 14. júní síðastliðinn réðust nokkrir náttúruverndarsinnar inn á ráðstefnu um áliðnað sem þá stóð á Hótel Nordica í Reykjavík og slettu þau grænleitu skyri yfir ráðstefnugesti. Arna og Ólafur Páll voru handtekin ásamt Bretanum Paul Gill. Búið er að dæma í máli Gills og hlaut hann tveggja ára skilorðsbundinn dóm. Sakborningarnir eiga nú yfir höfði sér allt að sex ára fangelsisdóm auk þess sem að bótakrafa flugleiðahótelanna hljómar upp á 600.000 krónur. Arna Ösp játar eignaspjöll, en þó ekki stórfelld, en neitar húsbroti. Ólafur Páll neitar hins vegar öllum sakargiftum. Aðalmeðferð mun fara fram upp úr miðjum október.