Aron fær leyfi til að fara

Aron Pálmi Ágústson hefur nú fengið leyfi til að yfirgefa heimabæ sinn vegna yfirvofandi fellibyls en hann óttast að það sé um seinan. Aron Pálmi, sem sætir refsivist í Bandaríkjunum, býr í bænum Beaumont sem er rétt við ríkjamörk Texas og Louisiana. Hann óskaði eftir því í gær að fá að yfirgefa borgina en fékk ekki leyfi til þess vegna skilorðsins sem hann er á. Borgaryfirvöld höfðu þó hvatt alla íbúa til að yfirgefa borgina í gær. Með hjálp íslenska sendiráðsins í Washington tókst Aroni að fá leyfi til að fara nú fyrir stundu. Hverfið sem Aron býr í er orðið mannlaust og bæði fjölskylda hans og nágrannar hafa flúið borgina. Hann veit því ekki hvernig hann á að koma sér í burtu. Verið er að reyna að fá flug fyrir hann en ef allt þrýtur ætlar Aron sér fótgangandi.