Mesta verðbólguskot í fjögur ár

Töluverðar líkur eru á því að Seðlabankinn hækki vexti í lok mánaðarins eftir að vísitala neysluverðs hækkaði um 1,5 prósent á milli ágúst og september sem var langt umfram væntingar. Búist hafði verið við um 0,9 prósenta hækkun. Leita þarf aftur til júní árið 2001 til að finna meiri verðbólguhækkun milli mánaða. Þetta þýðir að verðbólga á ársgrundvelli mælist nú 4,8 prósent og er komin vel yfir efri þolmörk Seðlabankans sem eru fjögur prósent. Markmið bankans er þó að halda verðbólgunni við 2,5 prósent á tólf mánaða tímabili. "Samkvæmt lögum þá ber okkur að senda ríkisstjórninni bréf þegar verðbólgan fer yfir fjögur prósent eða undir eitt prósent, ef það á við, og gera henni grein fyrir hvað Seðlabankinn hyggst gera. Það er ekki ákveðið hvenær bréf verða send en það er í stutt í það, gætu verið nokkrir dagar frekar en vikur," segir Eiríkur Guðnason seðlabankastjóri. "Þetta eru ekki góð tíðindi að verðbólgan skuli vera farin þetta mikið af stað og alvarlegt að hún skuli vera komin út fyrir þolmörkin," segir Tryggvi Þór Herbertsson, forstöðumaður Hagfræðistofnunar Háskóla Íslands. Hann er ekki bjartsýnn á framhaldið: "Ég held því miður að við séum að sjá undirliði verðbólgunnar hækka einn af öðrum vegna þenslunnar á vöru- og vinnumarkaði. Þessi hækkun hingað til hefur verið drifin af hækkunum á olíuverði og fasteignaverði en nú er ég hræddur um að það sé komið að áhrifum þessarar margumtöluðu þenslu." Mælingin sýndi að dagvara hækkaði meira í verði en spáð hafði verið en áhrif af útisölulokum voru einnig mikil. Olíuverð og fasteignaverð hækkuðu einnig mikið eins og búist var við. Tryggvi Þór telur stöðuna vera þá að peningamálastefna ráði ekki ein við þensluna. Nú verði stjórnvöld að fara á fullt við að draga saman í ríkisútgjöldunum til að styðja við stefnuna.