Lögregla veitti bifhjólum eftirför

Fjórum bifhjólum var veitt eftirför lögreglu frá Sæbraut og þaðan austur Suðurlandsbraut í kringum miðnætti í fyrrakvöld. Að sögn lögreglu mældust ökumenn bifhjólanna á um 120 kílómetra hraða á Sæbraut við Höfðatún þar sem hámarkshraði er sextíu. Á Suðurlandsbraut missti lögregla hins vegar af mönnunum þegar þeir tvístruðu sér í allar áttir, en lögregla segir þá hafa ekið á móti rauðu ljósi. Grunaðir menn voru síðan stöðvaðir tuttugu mínútum síðar á Kringlumýrarbraut og var þá tekin af þeim skýrsla. Málið er í rannsókn að sögn lögreglu sem segir ekki liggja fyrir hvort mennirnir verði ákærðir.