Ótrúlegur leikur í Glasgow í kvöld

Glasgow Celtic er úr leik í forkeppni Meistaradeildar Evrópu þrátt fyrir 4-0 sigur á Artmedia frá Slóvakíu á Celtic Park í kvöld. Slóvaska liðið vann fyrri leikinn heima fyrir 5-0 og því hefði Celtic þurft að komast í sögubækurnar til að knýja fram framlengingu með því að vinna upp þann mun. Alan Thompson og John Hartson komu Celtic í 2-0 fyrir hálfleik og Stephen McManus og Craig Beattie bættu um betur í síðari hálfleik. Fjórða mark Celtic kom 8 mínútum fyrir leikslok og allt ætlaði um koll að keyra en heimamenn náðu ekki að brjóta vörn gestanna á bak aftur eftir það. Gordon Strachan er nýtekinn við sem knattspyrnustjóri Celtic og hafa háværar raddir í Glasgow nú þegar farið fram á afsögn hans. Liðið gerði 4-4 jafntefli við  Motherwell í 1. umferð skosku úrvalsdeildarinnar um helgina en þá hafði liðið fengið á sig 9 mörk í fyrstu tveimur keppnisleikjunum undir stjórn Strachan.