Óveður á Taívan og Mexíkó

Öflugir stormar ollu manntjóni og miklum skemmdum í dag. Á Taívan fórust nokkrir þegar hvirfilbylurinn Haitang reið yfir og tugir þúsunda ferðamanna flýðu fellibylinn Emily í Mexíkó. Þeirra á meðal var hópur íslenskra ungmenna. Emily skall af krafti á Yucatan-skaganum í morgun og fór vindhraðinn upp í sextíu metra hraða í verstu kviðunum. Norðurvængur stormsins, þar sem veðrið var verst, lenti beint á bænum Cozumel og sló út rafmagni og símasambandi á strandlengjunni Riviera Maya. Þúsundir ferðamanna máttu hýrast í íþróttahúsum og öðrum neyðarskýlum við heldur frumstæðar aðstæður, þangað sem fólki var smalað þegar um helgina. Margir vildu reyndar ólmir komast úr skýlunum þar sem þar var lítið að bíta og brenna. Alls voru um sextíu þúsund ferðamenn fluttir til, þeirra á meðal hópur íslenskra ungmenna sem tók þátt í ólympíumóti í stærðfræði í bænum Merida. Þegar náðist í einn liðsmanninn fyrir fréttir var stormurinn afstaðinn. Benjamín Ragnar Sveinbjörnsson sagði að hótelið hefði verið með plan til að passa upp á alla. Fólk svaf í matsalnum þar til fellibylurinn gekk yfir og hann sagði hættuna ekki hafa verið mikla því auga fellibylsins var í hudnrað kílómetra fjarlægð og einnig var fellibylurinn kominn niður á annað hættustig. Ástandið er ekki mikið betra í Taívan, þar sem annar bylur, hvirfilbylurinn Haitang, slasaði tuttugu og tvo á yfirreið sinni í dag. Fjölmiðlar þar segja fjóra hafa týnt lífi en það hefur ekki fengist staðfest. Hálf milljón Kínverja hefur verið flutt frá heimilum sínum í suðausturhéruðum landsins þar sem Haitang stefnir nú þangað.