Hótel opnað eftir tæpar tvær vikur

Radisson Sas 1919 í gamla Eimskipahúsinu verður opnað 10. júní næstkomandi með pompi og prakt. Andri Már Ingólfsson, eigandi hótelsins, segir að um glæsilegasta hótel Íslands sé að ræða og fékk fréttastofa Stöðvar 2 að kíkja inn, nú þegar verið er að leggja lokahönd á verkið. Húsið var byggt árið 1919 og er hótelið nefnt eftir byggingarárinu, en það var Guðjón Samúelsson, húsameistari ríkisins, sem teiknaði það. Í meira en 80 ár var Eimskipafélag Íslands með höfuðstöðvar sínar í húsinu en það var um tíma með stærstu byggingum bæjarins. Upphaflega stóð til að hótelið yrði opnað þann 1. maí en Andri Már Ingólfsson, eigandi þess, segir að þar sem um fyrsta flokks hótel sé að ræða hafi verið ákveðið að fara sér hægar og gera hlutina vel. Á hótelinu verða 70 herbergi, þar af 16 svítur, og í anda þeirra Radisson-hótela sem eru úti í heimi. Gömlu Eimskipainnréttingarnar eru þó friðaðar og segir Andri Már þær vel geymdar á bak við nýju innréttingarnar og eflaust einhver ár í að þær sjáist aftur. Hótel hafa sprottið upp á undanförnum árum, bæði á höfuðborgarsvæðinu og landsbyggðinni. Andri Már segist þó ekki hræddur við samkeppnina. Það sé alltaf fyrir hendi samkeppni og húns sé af hinu góða. Andri segir að þrátt fyrir að um mikið verk sé að ræða sé kostnaðurinn hóflegur og ekki hafi verið farið yfir þá upphæð sem upphaflega var lagt upp með. Andri vill þó ekki segja til um hver kostnaðurinn sé. Það skipti miklu máli að vera innan fjárhagsáætlana því það sé mun dýrara að breyta gömlu húsi en að byggja nýtt. Það hefur ekkert verið til sparað í þessu sögufræga húsi en þrátt fyrir samkeppni á hótelmarkaði segist Andri Már engar áhyggjur hafa, hótelið sé einstakt.