Krefjast bóta vegna vanrækslu

"Því miður er raunin sú að margir byggingarstjórar rækja ekki skyldur sínar og biðja ekki um úttekt á þeim húsum sem þeir reisa," segir Magnús Sædal Svavarsson, byggingarfulltrúi Reykjavíkurborgar. Íbúar í fimm ára gömlu fjölbýlishúsi í Grafarholti íhuga að höfða mál vegna vanefnda verktakanna og galla á byggingunni. Engin lokaúttekt var gerð á húsinu fyrr en íbúi fór þess á leit við byggingarfulltrúa að það yrði gert. Byggingin er ekki lögformlega risin fyrr en slík úttekt hefur verið gerð og ýmsar tryggingar taka ekki gildi fyrr en þá. Þegar lokaúttektin var loks gerð kom í ljós að byggingin stóðst ekki ýmis grundvallarskilyrði, til dæmis um brunavarnir. Þá leka nokkrar íbúðanna og sums staðar hefur kvarnast úr múrverkinu. Verktakarnir eru í gjaldþrotameðferð og geta ekki lokið við bygginguna. Magnús segir ábyrgðina á lokaúttekt liggja hjá byggingarstjórunum, en eigendur íbúðanna sem og tryggingafélög sem seldu verktökunum starfsábyrgðartryggingu einnig geta farið fram á úttekt. "Oft lendir sú vinna sem sneri að byggingarstjóranum á yfirvöldum. Þetta getur kostað tafir og er dýrt," segir Magnús. Hann segir að staða íbúa í tilfelli sem þessu fari eftir samningum þeirra við verktakann. "Fólk getur lent í því að þurfa að ljúka við bygginguna á eigin kostnað og er í slíkum tilfellum hreinlega að tvígreiða fyrir íbúðina." Íbúar fjölbýlishússins í Grafarholti fara fram á að fá greitt úr tryggingarsjóði byggingarstjóra. Þeir bíða nú eftir skýrslu frá dómskvöddum matsmanni áður en þeir ákveða frekari aðgerðir.