Skotar í forystu

Skotar, sem hafa unað því misjafnlega síðustu aldirnar að lúta stjórn Englendinga, virðast nú sífellt vera að auka áhrif sín í breskum stjórnmálum. Ekki er nóg með að Tony Blair sé fæddur í Edinborg (án þess þó að vera "alvöru" Skoti) og nokkrir ráðherrar í stjórn hans síðustu tvö kjörtímabil hafi verið Skotar, heldur blasir við að eftirmaður hans í flokksleiðtogahlutverkinu – og þar með væntanlega líka á forsætisráðherrastólnum – verður "ekta" Skotinn Gordon Brown. Við þetta bætist að leiðtogi Frjálslyndra demókrata, Charles Kennedy, er þvottekta Skoti. Og hugsanlegur arftaki Michaels Howard sem leiðtogi Íhaldsflokksins er Skotinn Sir Malcolm Rifkind.