Frímerki seld fyrir 120 milljónir

"Við erum með ellefu þúsund fasta viðskiptavini í 75 löndum sem ýmist eru áskrifendur eða panta einstaka útgáfur," segir Vilhjálmur Sigurðsson, forstöðumaður Frímerkjasölu til safnara, sérstakrar deildar innan Íslandspósts sem þjónustar frímerkjasafnara um veröld víða. Þó níu manns vinni á deildinni er hún fámenn í samanburði við sambærilegar deildir annarra fámennra þjóða og segir Vilhjálmur að Álandseyingar og Færeyingar séu umfangsmeiri á þessu sviði en Íslendingar. "Við Íslendingar erum með minnstu frímerkjadeildina fyrir safnara á Norðurlöndum þannig að þetta helst ekki í hendur við höfðatöluna, þetta er heldur spurning um markaðssetningu." Frímerki eru markaðssett eins og aðrar söluvörur og nýjar útgáfur kynntar í víðlesnum fagtímaritum og á netinu. Þá skýrir það vinsældir Færeyskra frímerkja að litið er á þau sem hluta af dönsku frímerkjaflórunni og njóta þau góðs af því. "Ef við tilheyrðum ennþá Dönum seldum við miklu fleiri frímerki," segir Vilhjálmur og hlær. Til viðbótar við fasta kaupendur bætast fjölmargir sem skipta við sérstaka frímerkjaumboðsmenn eða nýta sér þjónustu póstverslana. Það er því ómögulegt að segja nákvæmlega til um hve margir safna íslenskum frímerkjum en sjálfsagt eru þeir á bilinu 15-20 þúsund. Vilhjálmur segir talsverða stafsemi í kringum frímerkjasöfnun í heiminum, til dæmis séu fjölmörg frímerkjablöð gefin út erlendis. Engu að síður hefur söfnunin látið á sjá. "Þetta er áhugamál sem er hægt og bítandi á hallanda fæti. Með breyttri tækni hefur dregið úr áhuga á frímkerjum og sjálfsagt spila tölvupóst og fax þar inní. Fyrir vikið hefur unga fólkið takmarkaðan áhuga á þessu. Þeir sem safna frímerkjum í dag eru því fyrst og fremst eldra fólk, það er allavega í miklum meirihluta." Sjálfur safnar Vilhjálmur frímerkjum, fyrst og fremst til að fylgjast með og vera vel með á nótunum.