Handahófskennd vinnubrögð

Mál skákmeistarans Bobby Fischer fær flýtimeðferð á Alþingi en Allsherjarnefnd Alþingis samþykkti fyrir helgina með öllum greiddum atkvæðum að veita honum ríkisborgararétt. Sæmundur Pálsson, vinur Fischers, gerir ráð fyrir að fara til Japans til að sækja hann og bókar flugið eftir helgina. "Ég býst við að vera á þingpöllum á mánudaginn til að sjá hvernig þetta fer," sagði hann í gær. Ragnar Aðalsteinsson hrl. segir að fjölmargir menn hafi dvalið á Íslandi árum saman og tali íslensku jafn vel og innfæddir. Þeir séu í raun orðnir Íslendingar en sumir þeirra verði ekki ríkisborgarar fyrr en eftir sjö ár. Valdið sé hjá Alþingi. Stundum hafi Alþingi notað það skynsamlega og stundum óskynsamlega. "Alþingi hefur tilhneigingu til að setja ýmis sérsjónarmið. Tvívegis hafa íþróttamenn fengið fyrirvaralausan ríkisborgararétt fyrir framgang keppnisíþrótta Íslands á alþjóðlegum vettvangi. Danska þingið hefur hinsvegar hafnað slíku og talið rangt að mismuna fólki af íþróttaástæðum," segir hann. Bjarni Benediktsson, formaður Allsherjarnefndar Alþingis, hefur sagt að erfitt sé að segja til um fordæmisgildi málsins og viljað gera sem minnst úr því. Ragnar telur hinsvegar að málið hljóti að hafa fordæmisgildi. "Þeir sem sækja um ríkisborgararétt og eru í erfiðri aðstöðu munu auðvitað benda á þetta fordæmi eins og fordæmið með íþróttamennina. Þetta er það sem mælir gegn svona handahófskenndum vinnubrögðum," segir hann og óttast að hætt verði að veita öðrum útlendingum ríkisborgararétt í bili því nóg þyki gert með Fischer. Stjórnvöld séu hugsanlega að slá sig til riddara í þessu máli. Ragnar kveðst ekki skilja samstarf Japana og Bandaríkjamanna í þessu máli. "Mér er enn algjörlega óljóst hvers vegna Fischer er haldið föngnum svona lengi án þess að framsalskrafa komi frá Bandaríkjunum. Hann er búinn að sitja meira en hálft ár í fangelsi og það er auðvitað brot á mannréttindum hans."