Enn við störf að Kárahnjúkum

Lettarnir fjórir sem hafa starfað fyrir GT verktaka að Kárahnjúkum án atvinnu- og dvalarleyfa eru enn við störf. Meira en mánuður er liðinn frá því Vinnumálastofnun sendi kæru vegna mannanna til sýslumannsins á Seyðisfirði. Forsaga málsins er sú að GT verktakar réðu til sín fjóra lettneska starfsmenn á þeim forsendum að þeir mættu vinna hér í 90 daga án atvinnu- og dvalarleyfa. Vinnumálastofnun kærði málið til sýslumannsins á Seyðisfirði og sagði Gissur Pétursson, forstjóri stofnunarinnar, að reglan um tímabundin störf gilti ekki í tilviki Lettanna. Gissur segir það umhugsunarefni að það sé látið líðast að mennirnir fjórir séu í raun við ólöglega iðju og haldi því áfram á meðan ekkert er að gert. Oddur Friðriksson, yfirtrúnaðarmaður að Kárahnjúkum, hefur sem slíkur rétt til að fá afrit af launaseðlum verkamanna og hefur farið fram á það við GT verktaka. Forsvarsmenn fyrirtækisins segja hins vegar að þeir hafi gert verktakasamning við lettneska starfsmannaleigu og því verði að hafa samband við hana til að fá upplýsingar af þessu tagi. Sjálfir fá mennirnir enga launaseðla, að sögn Odds, og hann segist hafa fengið það skriflega frá þeim í gær að mánaðarlaun þeirra séu 700 evrur, um 55.000 krónur. Lárus Bjarnason, sýslumaður á Seyðisfirði, segir rannsókn málsins lokið en vildi ekkert segja um niðurstöðurnar, það er hvort verið sé að brjóta lög. Löglærður fulltrúi á Egilsstöðum eigi eftir að fara yfir gögnin og hann þurfi síðan jafnvel að hafa samráð við ríkissaksóknara. Þá er bara spurning hvort dagarnir 90 verði liðnir og mennirnir farnir úr landi þegar menn komast loks að niðurstöðu.