Nýta sjávarfang til lyfjagerðar

Stefnt er að því að hefja byggingu á lyfjaverksmiðju á Húsavík. Norskt fyrirtæki stendur á bak við verkið en til stendur að unnin verði efni til lyfjagerðar úr sjávarfangi. Navamedic ehf., dótturfélag Navamedic ASA í Noregi, stefnir að því að hefja framkvæmdir við fyrri hluta verksmiðjuhúss í sumar að því er fram kemur í Fréttablaðinu í dag. Páll Eydal Reynisson, talsmaður Navavedic ehf., vildi ekki tjá sig um málið fyrr en það væri í höfn eða eftir einn til tvo mánuði. Of mikið væri um fréttir af verkefnum sem ekkert yrði úr. Í Fréttablaðinu segir að í fyrstu verði unnið kítín úr rækjuskel og verður það flutt til Noregs til frekari vinnslu. Í síðari áfanga er stefnt að því að koma á fót glúkósamínverksmiðju og á hún að vera tilbúin árið 2008.